KUELEKEA UBORESHAJI WA DAFTARI LA KUDUMU LA WAPIGA KURA

Posted on: August 18th, 2024

Na. Paul Kasembo, SHINYANGA DC.

KATIKA kuelekea Uboreshaji wa Daftari la Kudumu la Wapiga Kura Mkoani Shinyanga, Tume Huru ya Taifa ya Uchaguzi imeanza rasmi mafunzo ya Waandishi Wasaidizi na Waendesha vifaa vya Bayometriki katika ngazi ya Kata huku wito ukitolewa kwa wananchi wote kujitokeza kuanzia siku ya Jumatano tarehe 21 hadi 27 Agosti, 2024 zoezi ambalo litadumu kwa muda wa siku saba kila kituo.

Akizungumza mara baada ya kushuhudia kiapo cha kutunza Siri kwa Waandishi Wasaidizi na Waendesha vifaa vya Bayometriki Halmashauri ya Wilaya ya Shinyanga, Mratibu wa Uboreshaji wa Daftari la Kudumu la Wapiga Kura Mkoa wa Shinyanga Bw. Bakari Kasinyo amesema kuwa uboreshaji utafanyika katika vituo vilivyopo kwenye Mitaa, vijiji na vitongoji ambapo muda wa kufungua vituo utakuwa ni saa 2:00 asubuhi na kufungwa saa 12:00 jioni.