Posted on: August 22nd, 2025
Mkuu wa Mkoa wa Shinyanga, Mhe. Mboni Mhita ametoa wito kwa mamlaka husika kuhakikisha kuwa vitambulisho vya wafanyabiashara wadogo vinatolewa kwa wakati bila ucheleweshaji, ili kuwawezesha wananchi kuendesha shughuli zao halali kwa utulivu na bila bugudha.
Akizungumza wakati wa kikao na wadau wa biashara na maendeleo ya uchumi, RC Mhita amesema kuwa ucheleweshaji wa vitambulisho hivyo unakwamisha juhudi za kujenga mazingira rafiki ya biashara mkoani humo, hasa kwa wafanyabiashara wadogo wanaotegemea biashara zao za kila siku kwa maisha yao.
“Vitambulisho hivi vinapaswa kuwafikia walengwa kwa wakati. Tukichelewesha tunawapunguzia fursa za kiuchumi. Ninataka kuona kila mfanyabiashara anayestahili anapatiwa kitambulisho bila urasimu,” alisema RC Mhita.
Katika hatua nyingine, Mkuu huyo wa Mkoa ameridhia matumizi ya Soko la Ibinzamata kama gulio kwa siku moja kwa wiki, ikiwa ni sehemu ya mpango wa kuhamasisha biashara na kuwapa fursa wakazi wa maeneo hayo kufanya shughuli za kiuchumi kwa urahisi.
Hatua hiyo inalenga kuimarisha uchumi wa wananchi wa maeneo ya pembezoni, sambamba na kupunguza msongamano katika masoko makuu ya mjini.
RC Mhita amewataka viongozi wa halmashauri na wadau wa maendeleo kuendelea kushirikiana na wafanyabiashara ili kuhakikisha fursa zilizopo zinawanufaisha wananchi wengi zaidi.
Boma Street, Mwanza Road
Anuani: P.O.Box 320, Shinyanga
Simu: +255 28 2762222
Simu ya Mkononi:
Barua Pepe: ras@shinyanga.go.tz
