SIKU MIA 100 ZA RAIS SAMIA

Posted on: June 27th, 2021

DKT. SENGATI ATEMBELEA MIRADI MANISPAA YA SHINYANGA KUADHIMISHA SIKU 100 ZA SERIKALI YA WAMU YA SITA

Mkuu wa Mkoa wa Shinyanga Dkt. Philemon Sengati ametembelea miradi mitatu yenye thamani ya Mil. 528 inayoendelea katika Manispaa ya Shinyanga wakati wa kuadhimisha siku 100 za uongozi  serikali ya wa wamu ya sita chini ya Rais Samia Suluhu Hassan.

 Akiongea na vyombo vya habari wakati wa ukaguzi miradi hiyo Dkt. Sengati amesema kwa kipindi cha siku 100 Rais Samia Suluhu Hasani tayari ametoa kiasi cha Shilingi Mil. 50 kwa ajili ya ujenzi wa kituo cha Afya Kitangiri, Mil. 50 kwa ajili ya Shule ya Sekondari Ngokoro na Mil. 428 za ujenzi daraja  linalo unganisha Kata ya Kitangili na Kata ya Chamagua zilizoko Manispaa ya Shinyanga.

Dkt. Sengati ameongeza kuwa Rais Samia alitoa fedha kwa miradi hiyo kama hatua muhimu ya kuunga juhudi za wananchi ambao tayari walishaanza juhudi za ujenzi wa miundo mbinu ya shule pamoja na Kituo cha Afya na kusema kuwa kama watu wanakuwa na uelewa kuanzisha miradi yao  serikali lazima ichangie katika juhudi izo.

‘’Kiashiria kikubwa cha Maendeleo kwa namna yoyote ile ni kiwango kikubwa cha uelewa wa wananchi, ndio maana Rais ameendelea kuwekeza katika Shule ya Msingi, Sekondari na Vyuo vya kati na vya juu kwa kuweka fedha nyingi sana hivyo tuendelee kuunga mkono jitihada hizi’’.Aliongeza Dkt. Sengati.

Naye Mwenyekiti wa Serikali ya Mtaa ya Iwelyangula Bw. Robert Munyereshi ameishukuru Serikali ya awamu ya sita kwa kuleta fedha haraka kwa ajili ya ujenzi wa daraja la Iwelyangula linalounganisha Kata ya Kitangiri na Kata ya Chamagua na hivyo kuweka matumaini ya kuondokana na adha kubwa ya kukosa usafiri hasa baada ya daraja la awali kukatika na kuifanya mawasiliano yao kuwa magumu.

Mzee Munyereshi aliongeza kuwa kama Serikali itaendelea na juhudi hizi basi maendeleo ya Taifa hili yatakwenda kwa kasi sana akiwapongeza pia uongozi wa Manispaa na Wilaya kwa kuwa weledi na wenye haraka katika kushughulikia maendeleo ya wananchi.

Wakati huo Bi. Damaris Nyantabano mkazi wa Kata ya Ngokoro alimwambia Mkuu wa Mkoa wa Shinyanga kuwa baadhi ya wanawake jilani na Sekondari hiyo wamejitolea nguvu zao na kushiriki katika ujenzi wa vyumba vya madarasa na matundu ya vyoo ili kuunga juhudi za Rais Samia Suluhu hasani katika kuleta maendeleo lakini pia wanafanya hivyo kufaida ya watoto hao ambao watatumia madarasa hayo hapo baadae.

Naye Mkuu wa Wilaya ya Shinyanga Bi.Yasinta Mboneko alimwambia Mkuu wa Mkoa wa Shinyanga kuwa miradi hiyo inayoendelea ilianza na nguvu ya Wananchi na kuweza kuinua  jengo la Kituo cha Afya na baadae Serikali kutoa kiasi cha fedha kwa ajili ya kuongezea nguvu za wananchi kukamilisha ujenzi wa miradi hiyo.

Mkuu wa Mkoa wa Shinyanga Dkt. Philemon Sengati ametembelea miradi hiyo kama hatua ya awali ya kuadhimisha siku 100 za utawala wa Rais Samia Suluhu hasani na mchango wake kwa maendeleo ya Shinyanga na Tanzania kwa ujumla.