RC MHITA ASHIRIKI CHAKULA CHA PAMOJA NA TIMU YA RS SHINYANGA SPORT CLUB BAADA YA KUSHINDA VIKOMBE VIWILI MASHINDANO YA SHIMIWI.

Posted on: September 18th, 2025

Mkuu wa Mkoa wa Shinyanga Mhe. Mboni Mhita usiku wa kuamkia Septemba 18,2025  aliungana na wachezaji wa RS Shinyanga Sport Club kwa chakula cha pamoja mara baada ya kuwapokea na kupokea rasmi vikombe viwili walivyovishinda katika mashindano ya 39 ya SHIMIWI yaliyofanyika Jijini Mwanza.

Tukio hilo lilifanyika mara baada ya hafla fupi ya mapokezi ya vikombe hivyo katika Ofisi ya Mkuu wa Mkoa ambapo Mhe. Mhita amewapongeza wanamichezo hao kwa kuonyesha uzalendo, mshikamano na nidhamu katika kuiwakilisha vyema Shinyanga.

Akizungumza wakati wa chakula hicho, Mhe. Mhita ameahidi kuwa Ofisi ya Mkuu wa Mkoa itaendelea kutoa ushirikiano na sapoti ya kila mwaka kwa timu hiyo ili kuhakikisha wanafikia malengo makubwa zaidi, ikiwemo kutwaa ushindi wa jumla katika mashindano yajayo ya SHIMIWI.

“Nimefarijika sana kuona Shinyanga inarejea na vikombe. Hii ni ishara kuwa tunakwenda mbele na tukijipanga vizuri zaidi, naamini tutakuwa mabingwa wa jumla katika miaka ijayo. Ofisi yangu itaendelea kuwa bega kwa bega nanyi,” amesema Mh. Mhita.

Kwa upande wake Katibu Tawala wa Mkoa wa Shinyanga, CP Salum Hamduni, ameipongeza timu kwa kujitoa kwa hali na mali kuiwakilisha Shinyanga, na kusema ameridhishwa na nidhamu, ushirikiano na ari waliyoionesha wanamichezo hao katika mashindano hayo ya kitaifa.
Timu ya RS Shinyanga Sport Club imeshinda kikombe cha ubingwa wa kitaifa kwa upande wa mchezo wa karata (wanaume) na kikombe cha mshindi wa tatu kwa upande wa wanawake katika mchezo huo huo.