WATUMISHI MKOANI SHINYANGA WEKENI UMUHIMU KWENYE BIMA - DC. MTATIRO

Posted on: February 24th, 2025

#shinyanga_rs

Mkuu wa Wilaya ya Shinyanga Mhe. Julius Mtatiro ambaye alimwakilisha Mkuu wa Mkoa wa Shinyanga Mhe. Anamringi Macha amesema ipo haja kwa watumishi mkoani hapa kuweka umuhimu zaidi kwenye bima huku wakitakiwa kufuata ushauri wa madaktari ili waepukane na magonjwa nyemelezi.

Mhe. Mtatiro ameyasema hayo Februari 24, 2025 wakati akifungua Mafunzo kwa watumishi yaliyoendeshwa na Mamlaka ya Usimamizi wa Bima Tanzania (TIRA) ambayo pamoja na mambo mengibe yalilenga kuwajengea uelewa wa Bima ya maisha, gari, nyumba na mali nyinginezo.

"Kwa niaba ya Mkuu wa Mkoa, niseme tu kwamba kuna kila sababu ya kuweka umuhimu zaidi kwenye masuala yote yanayohusu Bima na kwa kuzingatia ushauri wa wataalam ili kuepukana na magonjwa nyemelezi,h amesema Mhe. Mtatiro.

Kwa upande wake Kamishna wa  Bima nchini Dkt. Baghayo Saqware amewataka watumishi mkoani Shinyanga kujenga utamaduni wa kukata bima ya kulinda mali zao ikiwemo Mazao, Madini, Viwanda na gari  jambo ambalo litawaepusha na hasara ya mali pale majanga yanapotokea ikiwemo mali zao  kuungua moto au kusombwa na mafuriko yanayosababishwa na mvua kubwa.

Dkt. Baghayo amesema kuwa, utafiti uliofanywa na  Mamlaka ya usimamizi wa bima Tanzania (TIRA)  umebainisha kuwa licha ya wananchi kutokuwa na uelewa wa kukatia bima mali zao, lakini pia hata watumishi nao wanakumbwa na hali hiyo.